نوابزادہ میررئیس خان رئیسانی نے مستونگ کوقلات ڈویژن سے الگ کرکے کوئٹہ ڈویژن میں شامل کرنے کو مستونگ کے قومی تاریخی حیثیت کومسخ کرنے کی کوشش قراردیتے ہوئے کہاہے کہ حکومت اپنافیصلہ واپس لیتے ہوئے مستونگ کی تاریخی حیثیت کودوبارہ بحال کرے۔اپنے جاری ایک مذمتی بیان میں نوابزادہ میررئیس رئیسانی نے مزیدکہاہے کہ صوبائی کابینہ نے مستونگ کی تاریخی حیثیت کوپس پشت ڈال کراسے قلات ڈویژن سے الگ کرکے کوئٹہ ڈویژن میں شامل کرنے کا جوفیصلہ کیاگیاہے اسے مستونگ کی قومی وتاریخی حیثیت کومسخ کرنے کی کوشش قراردیتے ہیں،انہوں نے کہاکہ مستونگ صرف انتظامی بنیادوں پر نہیں بلکہ تاریخی حیثیت سے قلات ڈویژن کاحصہ ہے،اس کی تاریخی، جغرافیائی حیثیت کو ختم کرنے کے حکومتی فیصلے کوقبول نہیں کرتے حکومت کے اس غیر ضروری و غیر منطقی فیصلے کیخلاف سیاسی، عوامی وآئینی جدوجہدکرینگے۔
