تیزاب گردی کے مجرم کی عمر قیدکی سزا برقرار، متاثرہ لڑکی کو 10 لاکھ روپے معاوضہ ادا کرنےکا بھی حکم

اسلام آباد: سپریم کورٹ نے تیزاب گردی کے خلاف ایک اہم فیصلہ سناتے ہوئے فیصل آباد کی اقرا پروین پر تیزاب پھینکنے والے مجرم عبدالمنان کی عمر قید کی سزا برقرار رکھی ہے جبکہ کم عمری کی بنیاد پر سزا میں نرمی کی اپیل مسترد کر دی۔

جسٹس ہاشم خان کاکڑ کی سربراہی میں جسٹس صلاح الدین پنہور اور جسٹس اشتیاق ابراہیم پر مشتمل تین رکنی بینچ نے 13 صفحات پر مشتمل فیصلہ جاری کیا۔

عدالت نے قرار دیا کہ وحشیانہ اور پہلے سے منصوبہ بند جرائم میں کم عمری کو ڈھال کے طور پر استعمال نہیں کیا جا سکتا اور تیزاب گردی قتل سے بھی زیادہ ہولناک جرم ہے کیونکہ قتل انسان کو ایک بار مارتا ہے جبکہ تیزاب کا شکار شخص پوری زندگی اذیت میں مبتلا رہتا ہے۔