بلوچستان سے حب الوطنی کے جذبے سے بھرپور نغمہ سامنے آنا باعث فخر ہے، وزیر اعظم شہباز شریف

اسلام آباد: وزیر اعظم شہباز شریف نے کہا ہے کہ یوم آزادی کی آمد کے موقع پر بلوچستان سے خوبصورت اور حب الوطنی کے جذبے سے بھرپور نغمہ سامنے آنا میرے لیے باعث فخر ہے۔

وزیر اعظم شہباز شریف نے یوم آزادی کے موقع پر بلوچی زبان میں ملی نغمے کی ویڈیو سماجی رابطے کی ویب سائٹ ایکس پر شیئر کرتے ہوئے لکھا کہ یوم آزادی قریب آتے ہی بلوچستان سے خوبصورت اور حب الوطنی کے جذبے سے بھرپور ملی نغمہ سامنے آنا میرے لیے باعث فخر ہے۔

شہباز شریف نے اس شاندار کاوش میں شامل تمام گلوکاروں، فنکاروں، پروڈیوسرز اور دیگر تمام افراد کے لیے دلی تحسین اور خلوص دل سے اظہار تشکر کیا۔

وزیر اعظم نے کہا کہ اس گیت میں ہمارے پیارے وطن پاکستان سے محبت کے جذبے کو نہایت خوبصورتی سے اجاگر کیا گیا ہے۔