اکتوبر میں نئے صوبوں کے قیام پر بحث کرائی جائے گی ، وفاقی وزیر طارق فضل چوہدری
اسلام آباد: وفاقی وزیر پارلیمانی امور طارق فضل چوہدری نے اعلان کیا ہے کہ اکتوبر میں نئے صوبوں کے قیام پر بحث کرائی جائے گی۔
میڈیا سے گفتگو میں طارق فضل چوہدری نے کہا کہ نئے صوبوں کی بحث کا اصل مقام پارلیمنٹ ہی ہے۔
وفاقی وزیر طارق فضل چوہدری نے کہا کہ اکتوبرمیں قومی اسمبلی اور سینیٹ اجلاس ہوں گے، ان میں نئے صوبوں کے قیام پر بحث کرائی جائے گی۔
اس کے علاوہ ان کا کہنا تھا کہ اسلام آباد ایک نئے گورننس ماڈل کو اختیار کرنے جارہا ہے۔
واضح رہے کہ اس سے قبل پیپلزپارٹی کے چیئرمین بلاول بھٹو نے مطالبہ کیا تھا کہ صوبوں کے معاملے پر بزنس فورمز کے بجائے قومی اسمبلی میں بحث ہو، پاکستان کے تمام مسائل کاحل جمہوریت میں ہے۔
بلاول بھٹو نے لندن میں میڈیا سے گفتگو کرتے ہوئے کہا کہ صوبوں کے حوالے سے پیپلزپارٹی کا واضح مؤقف ہے، سسٹم اگر فیل ہوا ہے تو قومی اسمبلی میں باقاعدہ بحث ہونی چاہیے۔
