امریکا کے امیر ترین افراد کی فہرست فوربز 400 میں 2026 کے دوران شامل ہونا پہلے کے مقابلے میں مزید مشکل ہوگیا ہے۔ اس سال اس فہرست میں جگہ بنانے کے لیے کم از کم 4.4 ارب ڈالر کی دولت درکار تھی، جو گزشتہ سال کے مقابلے میں 60 کروڑ ڈالر زیادہ ہے۔ فوربز کے مطابق ٹیکنالوجی ، خاص طور پر اے آئی، اس اضافے کی بڑی وجہ بنی ہے۔
2026 کی فوربز 400 فہرست میں 34 افراد پہلی مرتبہ شامل ہوئے ہیں۔ یہ تعداد گزشتہ سال کے صرف 14 نئے ارکان کے مقابلے میں نمایاں اضافہ ہے۔ گزشتہ دو دہائیوں میں نئے ارکان کی تعداد کے لحاظ سے یہ تیسرا بڑا سال رہا۔ اس سے زیادہ نئے افراد صرف 2007 میں شامل ہوئے تھے، جب 45 افراد پہلی مرتبہ فہرست کا حصہ بنے، جبکہ 2021 میں 44 نئے نام شامل ہوئے تھے۔
ان 34 نئے ارب پتیوں کی مجموعی دولت تقریباً 321 ارب ڈالر بنتی ہے، جو گزشتہ سال شامل ہونے والے نئے افراد کی مجموعی دولت سے تقریباً تین گنا زیادہ ہے۔ نئے ارکان میں سب سے کم عمر شخص کی عمر 30 سال جبکہ سب سے زیادہ عمر والے کی عمر 76 سال ہے۔
اس سال کے نئے ارکان میں ٹیکنالوجی کا شعبہ سب سے نمایاں ہے۔ 34 میں سے 15 افراد کا تعلق ٹیکنالوجی سے ہے اور نئے آنے والوں کی مجموعی دولت کا تقریباً 60 فیصد اسی شعبے سے حاصل ہوا ہے۔ ان میں زیادہ تر افراد اے آئی، روبوٹکس، سافٹ ویئر اور اس سے متعلق کاروبار سے وابستہ ہیں۔
نئے ارکان میں سب سے زیادہ دولت اوپن اے آئی کے شریک بانی گریگ بروک مین کے پاس ہے۔ فوربز کے اندازے کے مطابق ان کی دولت 25.5 ارب ڈالر ہے، جس کے ساتھ وہ امریکا کے 45ویں امیر ترین شخص بھی بن گئے ہیں۔ بروک مین نے رواں سال مئی میں ایک قانونی تنازع کے دوران بتایا تھا کہ اوپن اے آئی میں ان کے شیئرز کی مالیت 20 ارب ڈالر سے زیادہ ہے۔
روبوٹکس کے شعبے سے تعلق رکھنے والے بریٹ ایڈکاک بھی پہلی مرتبہ ’فوربز400‘ میں شامل ہوئے ہیں۔ ان کی کمپنی ’فگر‘ کو 2025 میں نجی سرمایہ کاروں نے 39 ارب ڈالر کی مالیت دی تھی، جس کے بعد فوربز نے ایڈکاک کی مجموعی دولت کا اندازہ 23.4 ارب ڈالر لگایا ہے۔
اے آئی کی کمپنی اینتھروپک کے چھ شریک بانی بھی اس سال فہرست میں شامل ہوئے ہیں۔ ڈینیئلا اموڈی، ڈاریو اموڈی، ٹام براؤن، جیک کلارک، جیرڈ کپلن اور سیم میک کینڈلش میں سے ہر ایک کی اندازاً دولت 15.5 ارب ڈالر ہے۔ ان چھ افراد کی مجموعی دولت تقریباً 93 ارب ڈالر بنتی ہے۔
یہ افراد 2021 میں اوپن اے آئی سے الگ ہو کر اینتھروپک کے قیام میں شریک ہوئے تھے۔ کمپنی نے اے آئی چیٹ بوٹ کلاڈ کے ذریعے مصنوعی ذہانت کے شعبے میں نمایاں مقام حاصل کیا۔ فوربز کے مطابق مئی میں کمپنی کی ایک بڑی سرمایہ کاری مکمل ہونے کے بعد ان شریک بانیوں کی دولت میں بھی نمایاں اضافہ ہوا۔
اے آئی سے دولت بنانے والوں میں کولوسل بایوسائنسز کے شریک بانی بین لیم بھی شامل ہیں، جن کی اندازاً دولت 5.7 ارب ڈالر ہے۔ وہ معدوم ہو چکے اونی میمتھ کو دوبارہ وجود میں لانے کی کوششوں کے باعث بھی شہرت رکھتے ہیں۔ اگست میں انہوں نے ایسٹرومیک کے نام سے ایک نئی اے آئی کمپنی کو کولوسل سے الگ کیا، جس کی ابتدائی مالیت 3.8 ارب ڈالر بتائی گئی۔ یہ کمپنی مصنوعی ذہانت کے ذریعے حیاتیاتی اور ارتقائی تبدیلیوں کی پیش گوئی پر کام کرتی ہے۔
ڈیٹا اور سافٹ ویئر کے شعبے سے ’ڈیٹا برکس‘ کے شریک بانی علی غدسی، آئیون اسٹوئیکا اور ماتی زہاریہ بھی پہلی مرتبہ فوربز 400 میں شامل ہوئے ہیں۔ ان کی کمپنی کی نجی مارکیٹ میں مالیت گزشتہ ایک سال کے دوران تیزی سے بڑھی۔ اگست میں ڈیٹا برکس کی مالیت 190 ارب ڈالر تک پہنچنے کے بعد تینوں شریک بانیوں کی دولت میں بھی نمایاں اضافہ ہوا۔
ورچوئل رئیلٹی کے شعبے سے پامر لکی بھی اس فہرست کا حصہ بن گئے ہیں۔ انہوں نے 2014 میں اپنی وی آر کمپنی اوکیولس کو فیس بک کو 2 ارب ڈالر میں فروخت کیا تھا۔ بعد ازاں 2017 میں انہوں نے دفاعی ٹیکنالوجی کمپنی اینڈوریل کی بنیاد رکھی۔ مئی میں ہونے والی سرمایہ کاری کے بعد اینڈوریل کی مالیت 61 ارب ڈالر تک پہنچ گئی، جس سے لکی کی اندازاً دولت 5.9 ارب ڈالر ہوگئی۔
ٹیکنالوجی کے شعبے میں کوگنیشن کے شریک بانی اور چیف ٹیکنالوجی افسر اسٹیون ہاؤ، جبکہ ویم سافٹ ویئر کے بانی رت میر تیماشوف بھی نئے ارکان میں شامل ہیں۔ تیماشوف نے 2006 میں اوہائیو میں ڈیٹا مینجمنٹ کمپنی قائم کی تھی جسے 2020 میں 5 ارب ڈالر میں فروخت کیا گیا۔
ایلون مسک کی کمپنی اسپیس ایکس کی کامیابی سے بھی بعض نئے ارب پتیوں کی دولت میں اضافہ ہوا۔ اسپیس ایکس کی جون میں ہونے والی بڑی اسٹاک مارکیٹ پیش رفت کے دوران سامنے آنے والی دستاویزات سے معلوم ہوا کہ پے پال کے شریک بانی اور وینچر کیپیٹلسٹ لیوک نوسیک کے پاس اسپیس ایکس کے 0.2 فیصد شیئرز ہیں، جن کی مالیت تقریباً 4.8 ارب ڈالر بتائی گئی۔ فوربز کے مطابق نوسیک کی مجموعی دولت تقریباً 5.5 ارب ڈالر ہے۔
ہیلتھ ٹیک کے کاروباری شخصیت کیتھ ڈنلیوی نے بھی اسپیس ایکس میں ابتدائی مرحلے میں سرمایہ کاری کی تھی، جس سے ان کی دولت میں اضافہ ہوا اور وہ فوربز 400 میں شامل ہوگئے۔ اسی طرح سرمایہ کاری کمپنی ویلور ایکویٹی پارٹنرز کے بانی انتونیو گراسیاس بھی اسپیس ایکس سمیت مسک کی کئی کمپنیوں کے ابتدائی سرمایہ کار رہے ہیں۔ ان کی اندازاً دولت 17.1 ارب ڈالر ہے، جس کی وجہ سے وہ نئے ارکان میں دولت کے لحاظ سے گریگ بروک مین اور بریٹ ایڈکاک کے بعد تیسرے نمبر پر ہیں۔
فنانس اور سرمایہ کاری کے شعبے سے سات نئے افراد فوربز 400 میں شامل ہوئے ہیں۔ ان میں کری ایٹو پلاننگ کے سربراہ اور اکثریتی مالک پیٹر مالوک کی دولت کا اندازہ 16.5 ارب ڈالر لگایا گیا ہے۔ امریکی وزیر تجارت ہاورڈ لٹنک بھی فہرست میں شامل ہوئے ہیں، جن کی اندازاً دولت 7.3 ارب ڈالر ہے۔ لٹنک کئی دہائیوں تک کینٹر فٹزجیرالڈ کی قیادت کرتے رہے اور 2024 میں سیاست میں آنے کے بعد کمپنی میں اپنی ملکیت کے شیئرز اپنی بالغ اولاد کو منتقل کیے۔
راکٹ مارگیج کے ارب پتی کاروباری شخص ڈین گلبرٹ کی سابق اہلیہ جینیفر گلبرٹ بھی پہلی مرتبہ فوربز 400 میں شامل ہوئی ہیں۔ ان کی اندازاً دولت 4.7 ارب ڈالر ہے۔ وہ اس سال فہرست میں شامل ہونے والی صرف چار نئی خواتین میں سے ایک ہیں۔
کھیلوں کی دنیا سے بھی دو نئے نام فوربز 400 میں پہنچے ہیں۔ ڈریگونیئر انویسٹمنٹ گروپ کے بانی مارک اسٹاڈ نے ایک ایسے معاہدے کی قیادت کی جس کے ذریعے این بی اے کی مینیسوٹا ٹمبر وولوز اور ڈبلیو این بی اے کی مینیسوٹا لنکس کا کنٹرول 4.5 ارب ڈالر میں حاصل کیا گیا۔ دوسری جانب کیل میک نائر کو اپنی والدہ جینس میک نائر کے انتقال کے بعد این ایف ایل کی ہیوسٹن ٹیکسنز میں 80 فیصد شیئرز وراثت میں ملے، جس کے بعد ان کی اندازاً دولت 7.7 ارب ڈالر ہوگئی۔
نئے ارب پتی صرف ٹیکنالوجی اور فنانس تک محدود نہیں رہے۔ مائیک ہولنگشید نے کنکریٹ کے کاروبار سے تقریباً 7.2 ارب ڈالر کی دولت بنائی، جبکہ تعمیراتی شعبے سے رابرٹ کلارک کی دولت کا اندازہ 7 ارب ڈالر ہے۔ گاڑیوں کے لوازمات کے کاروبار سے وابستہ ڈیوڈ میک نیل بھی تقریباً 5 ارب ڈالر کی دولت کے ساتھ فہرست میں شامل ہوئے ہیں۔
اس سال خاندانوں کی نئی نسل بھی فوربز 400 میں نمایاں ہوئی۔ طبی مصنوعات بنانے والی کمپنی میڈ لائن کے بانی خاندان کے تین افراد پہلی مرتبہ اس فہرست میں شامل ہوئے ہیں۔ چارلی ملز کی اندازاً دولت 11 ارب ڈالر جبکہ اینڈی ملز کی دولت 5.5 ارب ڈالر ہے۔ دونوں نے اپنے مرحوم والدین کی قائم کردہ کمپنی کو 2025 کی سب سے بڑی ابتدائی عوامی پیشکشوں میں سے ایک کے ذریعے اسٹاک مارکیٹ میں متعارف کرایا۔
اینڈی ملز کی بہن وینڈی ابرامز بھی 4.7 ارب ڈالر کی دولت کے ساتھ فہرست میں شامل ہوئی ہیں۔ خاندان کے دیگر کچھ افراد بھی ارب پتی ہیں، تاہم کمپنی میں ان کے نسبتاً کم شیئرزکی وجہ سے ان کی دولت 4.4 ارب ڈالر کی مطلوبہ حد سے کم رہی۔
فوربز400 میں اس سال صرف نئے چہرے ہی شامل نہیں ہوئے۔ چھ ایسے افراد بھی دوبارہ فہرست میں واپس آئے ہیں جو گزشتہ برسوں میں اس سے باہر ہوگئے تھے۔ ان میں سرمایہ کار کلفورڈ ایسنز، اسٹیفن مینڈل جونیئر، ڈینیئل سنڈہائم اور پابلو لیگوریتا کے علاوہ سیمی کنڈکٹر کمپنی کی شریک بانی ویلی ڈائی اور یو۔ہال کے چیئرمین ای جو شوئن شامل ہیں۔
مجموعی طور پر 2026 کی فوربز 400 فہرست اس بات کی عکاسی کرتی ہے کہ گزشتہ ایک سال کے دوران مصنوعی ذہانت، روبوٹکس، سافٹ ویئر اور ٹیکنالوجی سے متعلق نجی کمپنیوں کی بڑھتی ہوئی مالیت نے امریکا کے انتہائی دولت مند طبقے میں نئے نام شامل کرنے میں اہم کردار ادا کیا۔ تاہم فہرست میں کنکریٹ، تعمیرات، کھیلوں، فنانس، طبی مصنوعات اور دیگر روایتی شعبوں سے دولت بنانے والے افراد بھی نمایاں تعداد میں موجود ہیں۔
فوربز 400 میں شامل 34 نئے ارب پتی:
دولت کے یہ تخمینے 4 ستمبر 2026 کے مطابق ہیں۔
امیر ترین افراد کی اس لسٹ میں شامل افراد میں، 70 سالہ آگسٹ ٹرونڈل 4.4 ارب ڈالر کی دولت کے مالک ہیں اور انہوں نے یہ دولت فارماسیوٹیکل بزنس سے کمائی ہے۔ 57 سالہ کیتھ ڈنلیوی اور ان کا خاندان 4.6 ارب ڈالر کی دولت رکھتے ہیں، جبکہ ان کی دولت ہیلتھ آئی ٹی اور انویسٹمنٹس سے حاصل ہوئی ہے۔ 58 سالہ جینیفر گلبرٹ 4.7 ارب ڈالر کی دولت کی مالک ہیں اور ان کی دولت کا ذریعہ راکٹ مارگیج بزنس ہے۔ 61 سالہ وینڈی ابرامز 4.7 ارب ڈالر کی دولت رکھتی ہیں اور انہوں نے یہ دولت میڈیکل سپلائیز کے کاروبار سے حاصل کی ہے۔ 55 سالہ ایبل ایویلن 4.8 ارب ڈالر کی دولت کے مالک ہیں اور ان کی دولت ٹیلی کام بزنس سے بنی ہے۔
اس لسٹ میں شامل 67 سالہ ڈیوڈ میک نیل 5 ارب ڈالر کی دولت کے مالک ہیں اور انہوں نے یہ دولت آٹوموبائل ایکسیسریز کے کاروبار سے کمائی ہے۔ 68 سالہ کیتھرین کومیسو اور ان کا خاندان 5.2 ارب ڈالر کی دولت رکھتے ہیں، جبکہ ان کی دولت ٹیلی کام بزنس سے حاصل ہوئی ہے۔ 47 سالہ مارک اسٹاڈ 5.3 ارب ڈالر کی دولت کے مالک ہیں اور انہوں نے یہ دولت وینچر کیپیٹل کے شعبے سے بنائی ہے۔ 60 سالہ رت میر تیماشوف 5.4 ارب ڈالر کی دولت رکھتے ہیں اور ان کی دولت سافٹ ویئر بزنس سے بنی ہے۔ 60 سالہ لیری گیز بھی 5.4 ارب ڈالر کی دولت کے مالک ہیں اور انہوں نے یہ دولت پرائیویٹ ایکویٹی سے حاصل کی ہے۔ 51 سالہ لیوک نوسیک 5.5 ارب ڈالر کی دولت رکھتے ہیں، جو انہوں نے وینچر کیپیٹل اور اسپیس ایکس میں سرمایہ کاری سے حاصل کی ہے۔ 65 سالہ اینڈی ملز 5.5 ارب ڈالر کی دولت کے مالک ہیں اور انہوں نے یہ دولت میڈیکل سپلائیز کے کاروبار سے کمائی ہے۔
رابرٹ لو، 76 سال کی عمر میں 5.6 ارب ڈالر کی دولت کے مالک ہیں اور انہوں نے یہ دولت ٹرکنگ بزنس سے کمائی ہے۔ 44 سالہ بین لیم 5.7 ارب ڈالر کی دولت رکھتے ہیں اور ان کی دولت بایوٹیک کے شعبے سے حاصل ہوئی ہے۔ 30 سالہ اسٹیون ہاؤ 5.8 ارب ڈالر کی دولت کے مالک ہیں اور انہوں نے یہ دولت اے آئی سافٹ ویئر کے کاروبار سے بنائی ہے۔ 33 سالہ پامر لکی 5.9 ارب ڈالر کی دولت رکھتے ہیں، جو انہوں نے ورچوئل ریئلٹی اور ڈیفنس ٹیکنالوجی کے شعبوں سے حاصل کی ہے۔ 41 سالہ ماتی زہاریہ 7 ارب ڈالر کی دولت کے مالک ہیں اور ان کی دولت کا ذریعہ ڈیٹا برکس ہے۔ 61 سالہ آئیون اسٹوئیکا بھی 7 ارب ڈالر کی دولت رکھتے ہیں اور انہوں نے یہ دولت ڈیٹا برکس سے کمائی ہے۔ 67 سالہ رابرٹ کلارک 7 ارب ڈالر کی دولت کے مالک ہیں اور ان کی دولت کنسٹرکشن بزنس سے بنی ہے۔
کنکریٹ کے کاروبار سے دولت کمانے والے 56 سالہ ارب پتی مائیک ہولنگشید ہیں اور ان کا خاندان 7.2 ارب ڈالر کی دولت رکھتا ہے اور انہوں نے یہ دولت کنکریٹ کے کاروبار سے کمائی ہے۔ 65 سالہ ہاورڈ لٹنک اور ان کا خاندان 7.3 ارب ڈالر کی دولت کے مالک ہیں، جبکہ ان کی دولت کا ذریعہ فنانس کا شعبہ ہے۔ 47 سالہ علی غدسی 7.6 ارب ڈالر کی دولت رکھتے ہیں اور انہوں نے یہ دولت ڈیٹا برکس سے حاصل کی ہے۔ 64 سالہ کیل میک نائر 7.7 ارب ڈالر کی دولت کے مالک ہیں اور ان کی دولت کا ذریعہ ہیوسٹن ٹیکسنز ہے۔ 65 سالہ چارلی ملز 11 ارب ڈالر کی دولت رکھتے ہیں اور انہوں نے یہ دولت میڈیکل سپلائیز کے کاروبار سے کمائی ہے۔ 39 سالہ ڈینیئلا اموڈی 15.5 ارب ڈالر کی دولت کی مالک ہیں اور ان کی دولت اینتھروپک سے حاصل ہوئی ہے۔ 43 سالہ ڈاریو اموڈی بھی 15.5 ارب ڈالر کی دولت کے مالک ہیں اور ان کی دولت کا ذریعہ اینتھروپک ہے۔ 39 سالہ ٹام براؤن 15.5 ارب ڈالر کی دولت رکھتے ہیں اور انہوں نے یہ دولت اینتھروپک کے کاروبار سے کمائی ہے۔
جیک کلارک جوکہ صرف 37 سال کے ہیں، 15.5 ارب ڈالر کی دولت کے مالک ہیں اور انہوں نے یہ دولت اینتھروپک سے کمائی ہے۔ 42 سالہ جیرڈ کپلن بھی 15.5 ارب ڈالر کی دولت رکھتے ہیں اور ان کی دولت کا ذریعہ اینتھروپک ہے۔ 36 سالہ سیم میک کینڈلش 15.5 ارب ڈالر کی دولت کے مالک ہیں اور انہوں نے یہ دولت اینتھروپک کے کاروبار سے حاصل کی ہے۔ 56 سالہ پیٹر مالوک 16.5 ارب ڈالر کی دولت رکھتے ہیں اور ان کی دولت ویلتھ پلاننگ کے شعبے سے بنی ہے۔
انتونیو گراسیاس جو کہ 55 سال میں 17.1 ارب ڈالر کی دولت کے مالک ہیں اور انہوں نے یہ دولت انویسٹمنٹس سے کمائی ہے۔ 40 سالہ بریٹ ایڈکاک 23.4 ارب ڈالر کی دولت رکھتے ہیں اور ان کی دولت روبوٹس کے کاروبار سے بنی ہے جبکہ 37 سالہ گریگ بروک مین 25.5 ارب ڈالر کی دولت کے مالک ہیں اور انہوں نے یہ دولت اوپن اے آئی کے کاروبار سے حاصل کی ہے۔
یہ اعداد و شمار امریکا میں دولت کے بڑھتے ہوئے پیمانے اور نئی ٹیکنالوجی سے وابستہ کاروباروں کی تیزی سے بڑھتی ہوئی مالیت کی ایک نمایاں تصویر پیش کرتے ہیں۔
