ملک بھر کی صرافہ مارکیٹوں میں سونے کی قیمت میں کاروباری ہفتے کے تیسرے روز بھی بڑی کمی ریکارڈ کی گئی ہے، جس کے بعد فی تولہ سونا 4 لاکھ 53 ہزار 936 روپے کا ہوگیا۔
آل پاکستان جیمز اینڈ جیولرز صرافہ ایسوسی ایشن کے جاری کردہ اعداد و شمار کے مطابق بدھ کو فی تولہ سونے کی قیمت میں 1800 روپے کی کمی ہوئی، جس کے بعد نئی قیمت 4 لاکھ 53 ہزار 936 روپے مقرر ہوگئی۔
اسی طرح 10 گرام سونے کی قیمت 1544 روپے کم ہوکر 3 لاکھ 89 ہزار 176 روپے ہوگئی.
دوسری جانب عالمی مارکیٹ میں سونے کی قیمت 18 ڈالر کمی کے بعد 4314 ڈالر فی اونس ہوگئی، جس کے اثرات مقامی صرافہ مارکیٹ میں بھی دیکھے گئے۔
اس سے قبل منگل کو بھی سونے کی فی تولہ قیمت میں 1800 روپے کمی ریکارڈ کی گئی تھی، جس کے بعد قیمت 4 لاکھ 55 ہزار 736 روپے ہوگئی تھی۔
پاکستان میں سونے کی قیمت رواں ماہ مسلسل اتار چڑھاؤ کا شکار رہی ہے۔ ستمبر کے دوران فی تولہ سونے کی قیمت تقریباً 4 لاکھ 43 ہزار 647 روپے سے 4 لاکھ 59 ہزار 540 روپے کے درمیان رہی۔
سونا روایتی طور پر سرمایہ کاری کا ایک اہم ذریعہ سمجھا جاتا ہے اور عالمی سطح پر اس کی قیمت پر افراط زر، شرح سود، معاشی حالات اور عالمی مالیاتی مارکیٹ میں ہونے والی تبدیلیاں اثرانداز ہوتی ہیں۔ غیر یقینی معاشی حالات میں سرمایہ کار اکثر سونے کی جانب بھی رخ کرتے ہیں۔
پاکستان میں سونے کی قیمت کے تعین کے طریقہ کار میں بھی تبدیلی کی گئی تھی، جس کے تحت مقامی مارکیٹ میں سونے کی قیمت عالمی مارکیٹ کے ریٹ سے 20 ڈالر فی اونس زیادہ مقرر کی گئی۔
