میر رضا قتل کیس کی تحقیقات کرنے والے جوڈیشل کمیشن نے نوجوان تاجر میر رضا کے اہلخانہ کی سینئر پولیس افسران کو طلب کرنے کی درخواست مسترد کردی۔
جوڈیشل کمیشن کے سربراہ جسٹس عمر سیال نے گزشتہ روز کی کارروائی کا حکم نامہ جاری کرتے ہوئے لکھا کہ اہلخانہ نے ایڈیشنل آئی جی، ڈی آئی جی عامر فاروقی اور ڈی آئی جی فرخ لنجار کو بلانےکی درخواست دی تھی۔
انہوں نے بتایا کہ 17 ستمبر کو آگاہ کیا تھا کہ سینئر پولیس افسران کو ذاتی طور پر طلب نہیں کیا جائے گا، اہل خانہ سینیئر پولیس افسران سے اپنے سوالات 26 نومبر تک تحریری طور پر جمع کرا سکتے ہیں۔
گزشتہ روز جسٹس عمر سیال نے سیکرٹری ہیلتھ اور ڈی جی ہیلتھ پر سخت برہمی کا اظہار کرتے ہوئے کہا کہ انہوں نے غیر قانونی طور پر مداخلت کرکے میر رضا قتل کیس میں میڈیکل بورڈ تشکیل دیا اور بورڈ میں تبدیلیاں کیں۔
کمیشن نے کہا کہ پہلی تحقیقاتی ٹیم کے سربراہ ایس ایس پی سمیع اللہ سومرو نے 6 دن میں کیس کا بیڑہ غرق کیا، 52 کیمروں میں سے ایک فوٹیج لی، کرائم سین کی جھاڑیاں جلا دیں، پہلی تفتیشی ٹیم نے شواہد ضائع کیے اور ماتحتوں پر ملبہ ڈال دیا۔
