امریکا: مبینہ پاکستانی شہری کیخلاف امریکی پوسٹل سروس کو 12 کروڑ 60 لاکھ ڈالر کا نقصان پہنچانے کے الزام
امریکی ریاست فلوریڈا میں پاکستان کے ایک مبینہ شہری کے خلاف امریکی پوسٹل سروس کو بارہ کروڑ 60 لاکھ ڈالر کا نقصان پہنچانے کے الزام میں فرد جرم عائد کر دی گئی۔
خانیوال سے تعلق رکھنے والے 33 سالہ فہیم اکرم نامی اس شخص پر الزام ہے کہ یہ ایک ویب سائٹ چلا رہا تھا جس کے ذریعے امریکا کے جعلی ڈاک لیبل یا ٹکٹ بیچے جاتے تھے۔
امریکی اٹارنی کے دفتر کی ویب سائٹ کے مطابق ملزم نے ڈاک کے وزن یا منزل سے قطع نظر ہر ٹکٹ کی قیمت 2 ڈالر رکھی تھی جو امریکی پوسٹل سروس کے ٹکٹ کی قیمت سے بہت کم تھی، ملزم نے اس طرح کے 51 لاکھ ٹکٹ فروخت کیے۔
امریکی حکام نے بتایا ہے کہ یہ ویب سائٹ اب بند کرائی جا چکی ہے۔
امریکی پوسٹل انسپکشن سروس کے انسپکٹر انچارج نے کہا ہے کہ امریکا کی رسائی اپنی سرحدوں سے باہر تک ہے، امریکی پوسٹل سروس سے فراڈ کرنے والوں کو ڈھونڈ کر انصاف کے کٹہرے تک پہنچایا جائے گا۔
امریکی پوسٹل انسپیکشن سروس نے ملزم کی گرفتاری کے حوالے سے اطلاع دینے پر ایک لاکھ امریکی ڈالر کے انعام کا اعلان بھی کیا ہے۔
تفتیش سے معلوم ہوا ہے کہ اپنے سامان کی ترسیل کے لیے 5 ہزار 200 افراد نے جعلی ویب سائٹ سے ٹکٹ خریدے جس سے امریکی پوسٹل سروس کو 12 کروڑ 60 لاکھ ڈالر کا نقصان پہنچا۔
اگر فہیم اکرم پر جرم ثابت ہو گیا تو اسے سازش اور جعلی ٹکٹ بنانے کے الزام میں 5 سال اور آن لائن فراڈ کے الزام میں 20 سال قید کی سزا سنائی جا سکتی ہے۔
