اسرائیل نے مقبوضہ مغربی کنارے میں اسرائیلی آبادکاروں پر برطانوی پابندیوں کے ردعمل میں یروشلم میں قائم برطانوی قونصل خانہ بند کرکے 20 سفارتکاروں کو ملک سے بے دخل کر دیا۔
سفارتی کشیدگی اس وقت شروع ہوئی جب برطانیہ، کینیڈا اور فرانس سمیت 12 ممالک نے مقبوضہ مغربی کنارے میں فلسطینیوں پر پرتشدد حملوں کے بعد اسرائیلی آبادکاروں کے ساتھ تجارت پر پابندیاں عائد کیں۔ اسرائیلی وزیر خارجہ نے 8 ستمبر کو برطانوی قونصل خانہ بند کرنے کا حکم دیا تھا۔
اسرائیلی وزیر خارجہ گڈون ساعر نے تصدیق کی کہ یروشلم میں برطانوی قونصل خانے نے اپنا کام بند کردیا ہے۔ اور قونصل جنرل سمیت 20 سفارتکاروں کے مشن ختم کردیئے گئے ہیں اور وہ اسرائیل چھوڑ رہے ہیں۔
انہوں نے کہا کہ دونوں ممالک کے درمیان کشیدگی مزید بڑھنے سے روکنے کے لیے برطانوی حکومت کے ساتھ مذاکرات کے بعد یہ اقدام کیا گیا۔ قونصل خانے کی عمارت برطانوی حکومت کی ملکیت ہے، جہاں 7 سفارتکاروں پر مشتمل ایک ٹاسک فورس انتہائی محدود دائرہ کار میں کام جاری رکھ سکے گی۔
