آئی جی خیبر پختونخوا نے احتجاج اور مظاہروں سے نمٹنے کیلئے ضلعی پولیس افسران کو ہدایات جاری کردیں
خیبرپختونخوا پولیس کو احتجاج اور مظاہروں سے نمٹنے کے لیے آپریشنل ہدایات جاری کردی گئیں۔
آئی جی خیبر پختونخوا کی جانب سے ضلعی پولیس افسران کو گائیڈ لائنز جاری کی گئی ہے جن میں ممکنہ مظاہرے کی صورت میں حفاظتی اقدامات مکمل رکھنے کی ہدایت کی گئی ہے۔
ہدایت نامے میں کہا گیا ہے کہ شر پسند اور ریاست مخالف املاک کو نقصان پہنچا سکتے ہیں، ڈی پی اوز پولیس نفری کی موجودگی کو یقینی بنائیں اور اینٹی رائٹ، اسپیشل اسکواڈ، سادہ کپڑوں میں اہلکاروں کو تعینات کیا جائے۔
جاری ہدایات میں یہ بھی کہا گیا ہے کہ املاک، تھانوں، پیٹرول پمپس اور بینکس وغیرہ کی سکیورٹی یقینی بنائی جائے۔
ہدایت نامے میں یہ بھی کہا گیا ہے کہ مظاہرے اور غیر قانونی اجتماع کا مسئلہ مذاکرات سے حل کیا جائے، مذاکرات سے مسئلہ حل نہ ہوں تو پہلے اینٹی رائٹ اسکواڈ، پھر ہوائی فائرنگ اور پھر ربڑ کی گولیاں استعمال کی جائیں اوراحتجاجی مظاہرین کی مکمل ویڈیو اور نگرانی کی جائے۔
پولیس کو ہدایت کی گئی ہے کہ ضلعی انتظامیہ اور قانون نافذ کرنے والے اداروں کے ساتھ رابطہ بہتر بنایا جائے۔
خیال رہے کہ وفاقی حکومت نے خیبر پختونخوا میں ایمرجنسی لگانے کا فیصلہ کرلیا ہے۔
ذرائع کا بتانا ہے ایمرجنسی کے نفاذ کی توثیق کے لیے پارلیمنٹ کے دونوں ایوانوں کا اجلاس بھی طلب کیا گیا ہے۔
ذرائع کے مطابق وفاقی کابینہ کا اجلاس کل صبح ساڑھے 9 بجے طلب کیا گیا ہے جس میں خیبر پختونخوا میں ایمرجنسی کے نفاذ کی منظوری لیے جانے کا امکان ہے۔
