پاکستانی شہری اب بیورو آف امیگریشن اینڈ اوورسیز ایمپلائمنٹ (بی ای او ای) کے سرکاری آن لائن پورٹل کے ذریعے بیرون ملک ملازمتوں کی تفصیلات حاصل کرنے کے ساتھ مشتہر آسامیوں کی قانونی حیثیت کی تصدیق بھی کر سکتے ہیں۔
سرکاری ادارے کی ویب سائٹ اور فیس بک پیج پر بیرون ملک ملازمتوں کے مواقع سے متعلق معلومات فراہم کی جاتی ہیں۔ امیدوار ان ذرائع سے لائسنس یافتہ ریکروٹنگ ایجنسیوں کی جانب سے مشتہر ملازمتوں کی تفصیلات معلوم کر سکتے ہیں اور درخواست دینے سے پہلے متعلقہ آسامی کی منظوری کی جانچ کر سکتے ہیں۔
بیرون ملک ملازمتوں کی منظوری کا طریقہ کار
امیگریشن رولز 1979 کے تحت پروٹیکٹر آف امیگرنٹس لائسنس یافتہ ریکروٹنگ ایجنسیوں کو مخصوص مدت کے لیے کارکنوں کی بھرتی کی اجازت دیتا ہے۔ تاہم اجازت جاری کرنے سے پہلے بیرون ملک آجر کی جانب سے فراہم کردہ ملازمتوں کی طلب اور متعلقہ دستاویزات کی تصدیق کی جاتی ہے۔
ملازمتوں کی طلب کی جانچ کے لیے متعلقہ ملک میں پاکستانی سفارت خانے، میزبان ملک کی وزارت خارجہ اور پاکستان میں متعلقہ غیر ملکی سفارت خانے کے ذریعے تصدیق کا طریقہ اختیار کیا جاتا ہے۔
پرمیشن ٹریکنگ نمبر کیا ہے؟
بھرتی کی اجازت منظور ہونے کے بعد متعلقہ آسامیوں کے لیے ایک منفرد پرمیشن ٹریکنگ نمبر (پی ٹی این) جاری کیا جاتا ہے۔ ریکروٹنگ ایجنسیوں کے لیے ضروری ہے کہ وہ ملازمت کے اشتہار میں یہ نمبر درج کریں تاکہ امیدوار آسامی کی تفصیلات اور منظوری کی حیثیت کی جانچ کر سکیں۔
ملازمت کے خواہشمند افراد بیورو آف امیگریشن اینڈ اوورسیز ایمپلائمنٹ کے سرکاری پورٹل پر متعلقہ پی ٹی این کے ذریعے مشتہر آسامی کی تصدیق کر سکتے ہیں۔ اس سے یہ معلوم کرنے میں مدد ملتی ہے کہ آیا متعلقہ ملازمت منظور شدہ بھرتی کے تحت درج ہے یا نہیں۔
Beoe
آسامی پُر ہونے پر کیا ہوتا ہے؟
اگر ریکروٹنگ ایجنسی مشتہر کردہ تمام آسامیوں پر بھرتی مکمل کر لے تو متعلقہ ملازمت کی فہرست ویب سائٹ سے خودکار طور پر ہٹا دی جاتی ہے۔ لائسنس یافتہ ایجنسیوں پر لازم ہے کہ وہ بھرتی کے عمل اور کارکنوں سے متعلق معاملات میں مقررہ ضوابط کی پابندی کریں۔
اگر کسی امیدوار یا بیرون ملک ملازمت کرنے والے پاکستانی کارکن کو بھرتی یا ملازمت کے سلسلے میں کوئی مسئلہ درپیش ہو تو وہ بیورو آف امیگریشن اینڈ اوورسیز ایمپلائمنٹ یا متعلقہ پروٹیکٹر آف امیگرنٹس سے رجوع کرکے شکایت درج کرا سکتا ہے۔
جعلی ملازمتوں اور فراڈ سے کیسے بچیں؟
بیرون ملک ملازمت کے لیے درخواست دینے، دستاویزات جمع کرانے یا رقم ادا کرنے سے پہلے امیدواروں کو متعلقہ ریکروٹنگ ایجنسی کے لائسنس، ملازمت کی منظوری اور پرمیشن ٹریکنگ نمبر کی تصدیق کرنی چاہیے۔ اس احتیاط سے جعلی اشتہارات اور غیر قانونی بھرتی کے خطرات کم کرنے میں مدد مل سکتی ہے۔
بیورو آف امیگریشن اینڈ اوورسیز ایمپلائمنٹ کی ویب سائٹ پر بیرون ملک ملازمتوں کی تفصیلات اور تصدیق کی سہولت دستیاب ہے۔
