اسلام آباد ہائیکورٹ نے مہندی کی تقریب میں بھگدڑ کےکیس میں ٹک ٹاکرکی ضمانت منظورکرلی

اسلام آباد ہائی کورٹ کے چیف جسٹس سردار محمد سرفراز ڈوگر نے ٹک ٹاکر انصر محمود عرف مسٹر پتلو کی حفاظتی ضمانت کی درخواست پر سماعت کی۔

پٹیشنر اپنے وکیل بیرسٹر قاسم نواز عباسی کے ہمراہ وہیل چیئر پر عدالت پہنچے۔ درخواست میں مؤقف اختیار کیا گیا تھا کہ ان کے خلاف ضلع سیالکوٹ کے تھانہ موترہ میں قتل بالسبب، غیر قانونی اجتماع ، ہنگامہ آرائی اور بھگدڑ مچنے سے 2 افراد کے جاں بحق اور متعدد افراد کے زخمی ہونےکا مقدمہ درج ہے۔

درخواست میں مؤقف اختیار کیا گیا کہ اس عدالت کا اختیار ہےکہ وہ ضمانت قبل از گرفتاری کے لیے متعلقہ عدالت سے رجوع کرنےکا موقع دے اور کیس کے میرٹس پر جائے بغیر حفاظتی ضمانت منظور کرے۔

عدالت نے ملزم کی استدعا منظورکرتے ہوئے 10 نومبر تک حفاظتی ضمانت منظور کرلی، عدالت نے ملزم کو 10 نومبر تک متعلقہ عدالت سے رجوع کرنےکی ہدایت کی ہے۔