کراچی کے علاقے ابو الحسن اصفہانی روڈ کے قریب ڈیڑھ ماہ قبل نالے میں ڈوبنے والی خاتون کا سراغ نہیں لگایا جاسکا۔
خاتون ڈاکٹر کا نالے میں ڈوبنےکا مبینہ واقعہ 14 ستمبر کی شب پیش آیا تھا جن کا اب تک کچھ پتہ نہ چل سکا۔
پولیس کا بتانا ہےکہ ابتدائی تفتیش میں خاتون ڈاکٹر نے خود چھلانگ لگائی تھی، واقعے سے قبل شوہر سے تلخ کلامی بھی ہوئی تھی۔
پولیس کے مطابق واقعےکے ایک ماہ بعد بھی نالے میں خاتون ڈاکٹر کی تلاش کے لیے ریسکیو آپریشن کیا گیا تھا، کچھ روز بعد اطلاعات موصول ہوئیں کہ خاتون ڈاکٹر مبینہ طور پر آبائی علاقے گلگت روانہ ہوگئی ہیں تاہم آبائی علاقے میں بھی خاتون ڈاکٹر کا کچھ پتہ نہیں چل سکا۔
پولیس کے مطابق خاتون ڈاکٹر کے شوہر کو گرفتار کرکے تفتیش کی گئی تھی لیکن اب خاتون ڈاکٹر کا شوہر ضمانت پر رہا ہوچکا ہے۔
