پاکستان کی منیشہ علی نے ایم ایم اے ورلڈ کپ میں گولڈ میڈل جیت لیا

لوانڈا، انگولا: پاکستان کی گلگت بلتستان سے تعلق رکھنے والی مکسڈ مارشل آرٹس فائٹر منیشہ علی نے انٹرنیشنل مکسڈ مارشل آرٹس فیڈریشن (IMMAF) ورلڈ کپ میں شاندار کامیابی حاصل کرتے ہوئے گولڈ میڈل اپنے نام کر لیا۔

منیشہ علی نے میزبان فائٹر لیونیلا ازابیل بلیائے کو دوسرے راؤنڈ میں سبمیشن کے ذریعے شکست دی۔ مقابلے کے اختتامی لمحات میں، صرف 15 سیکنڈ باقی رہنے پر منیشہ نے اسٹینڈنگ گِلّوٹین لگا کر فتح یقینی بنائی۔

منیشہ علی لاہور کے Brave Gym میں تربیت حاصل کرتی ہیں۔ انہوں نے اپنی کامیابی کا سہرا اپنی مسلسل محنت، تربیت اور اپنے مینٹور عمر احمد کو دیا۔

منیشہ اب پاکستان اوپن میں شرکت کے بعد IMMAF ورلڈ چیمپئن شپ میں حصہ لینے کی تیاری کر رہی ہیں، جو یکم نومبر سے جارجیا میں شروع ہوگی۔ ان کا ہدف عالمی چیمپئن بننے کے ساتھ ساتھ مستقبل میں UFC تک رسائی حاصل کرنا ہے۔