اسلام آباد: وزیراعظم کے مشیر برائے سیاسی امور رانا ثنا اللہ نے کہا ہے کہ آزاد کشمیر میں کالعدم ایکشن کمیٹی مہاجرین کی نشستوں کے مطالبے کی آڑ میں لشکرکشی کرنا چاہتی ہے۔
قومی اسمبلی اجلاس میں اظہار خیال کرتےہوئے رانا ثنااللہ نے کہا کہ گزشتہ سال کالعدم ایکشن کمیٹی نے 38 مطالبات پیش کیے تھے، ان میں سے کوئی ایسا مطالبہ نہیں تھا جس پر کام نہیں کیا گیا مگر کالعدم ایکشن کمیٹی نے ایک سال پہلے کشمیر میں جلاو گھیراؤ کا راستہ اپنایا۔
انہوں نے کہا کہ کالعدم ایکشن کمیٹی کا بجلی سے متعلق 10 ارب روپے کا مطالبہ تھا اور اس حوالے سے امداد فراہم کی گئی، پورے پاکستان میں بجلی کے نرخ سب کو معلوم ہیں مگر آزادکشمیر میں آج بھی بجلی ساڑھے تین روپے یونٹ دی جاتی ہے جب کہ آزادکشمیر کے لیے گندم پر سبسڈی بھی فراہم کی جارہی ہے۔
رانا ثنااللہ کا کہنا تھا کہ کمیٹی مہاجرین کی نشستوں پر اپنی سفارشات آزاد کشمیر حکومت کو پیش کرے گی مگر کالعدم ایکشن کمیٹی کا مطالبہ ہے اسمبلی میں مہاجرین کی 12 سیٹیں ختم کردی جائیں، مہاجرین کو حق رائے دہی سے محروم کرنا تحریک آزادی کے مقصد سے انحراف ہے۔
انہوں نے مزید کہا کہ کالعدم ایکشن کمیٹی کو کئی آپشن دیے گئے جن سے انکارکردیا گیا، ایکشن کمیٹی نے جتھا کلچر کے ذریعے اپنا مطالبہ منوانے کا راستہ اپنایا ، ایکشن کمیٹی مہاجرین کی نشستوں کے مطالبے کی آڑ میں لشکرکشی کرنا چاہتی ہے۔
