21 ہزار سے زائد پاکستانی بیرون ممالک جیلوں میں قید، سعودی عرب میں سب سے زیادہ تعداد

دنیا کے مختلف ممالک میں قید پاکستانی قیدیوں کی تفصیلات قومی اسمبلی میں پیش کردی گئیں۔

طاہرہ اورنگزیب کے سوال پر وزیر خارجہ اسحاق ڈار نے تحریری جواب میں ایوان کو بتایا کہ اس وقت دنیا کے 72 ممالک میں پاکستانی قیدیوں کی مجموعی تعداد 21 ہزار 647 ہےجن میں 13078 زیر ٹرائل اور 8569 سز ایافتہ ہیں۔

وزارت خارجہ کے مطابق یہ پاکستانی قیدی دھوکا دہی ،منشیات کی اسمگلنگ، جنسی حملے، جعلی ویزے اور جعلی دستاویزات قتل سمیت دیگر مقدمات میں ملوث ہیں، سب سے زیادہ قیدی سعودی عرب میں ہیں جن کی تعداد 10745ہے، ان میں 5445جدہ اور 5300 ریاض میں قید ہیں جب کہ دوسرے نمبر پر متحدہ عرب امارات میں 5297 پاکستانی قید ہیں۔

وزارت خارجہ کے دستاویز کے مطابق 2100 قیدی ان 14ممالک میں قید ہیں جن کے ساتھ ملزمان کی حوالگی کا معاہدہ نہیں، عراق میں 81، اردن میں 8، مصرمیں 12،بحرین میں 581، عمان میں 252، قطر میں 599 ، آسٹریلیا میں 27، جنوبی کوریا 7، جاپان 16،ملائیشیا 459، تھائی لینڈ 35،کمبوڈیا 22 ، فلپائن اور ویتنام میں ایک، ایک پاکستانی قید ہے۔