لاہور: سہیل آفریدی کی مرحوم کارکن کے گھر آمد، شکوہ کرنے پر سکیورٹی کا فیملی ممبر پر مبینہ تشدد

وزیر اعلیٰ سہیل آفریدی اور سیکرٹری جنرل پی ٹی آئی سلمان اکرم راجہ نے لاہور میں پی ٹی آئی کے مرحوم کارکن اشتیاق احمد کے گھر جاکر اہل خانہ سے تعزیت کی، جس دوران اہلخانہ نے غم و غصے کا اظہار کیا۔

اہلخانہ کا کہنا تھا کہ اشتیاق احمد 17 دن اسپتال میں زیر علاج رہنے کے بعد جان کی بازی ہار گیا اور کسی نے خبر تک نہ لی، اہلخانہ کے شکوے کے دوران سہیل آفریدی کے گارڈ نے اشتیاق احمد کے فیملی ممبر کو مبینہ طور پر تشدد کا نشانہ بنا ڈالا۔

وزیراعلیٰ کے ساتھ ڈیوٹی پر تعینات پولیس کے ٹی ایس آئی حازق بن ارشد نے ویڈیو بیان میں بتایا کہ وہ وی وی آئی پی سکیورٹی ڈیوٹی کے لیے سی ایم کے پی کے ساتھ مصری شاہ میں تعینات تھا، وزیر اعلیٰ کے پی متوفی اشتیاق احمد کے گھر تعزیت کے لیے آئےتھے، فیملی نے سیاسی گفتگو سے منع کیا تو ان کی سکیورٹی نے بدمزگی شروع کردی۔

دوسری جانب وزیراطلاعات پنجاب عظمیٰ بخاری کا کہنا ہے کہ تحریک انصاف کے حامی یوٹیوبرز نے اشتیاق احمد کی موت کے واقعے کو غلط رنگ دیا، جبکہ مرحوم کے بیٹے کا بیان بھی آن ریکارڈ ہے کہ یہ ایک حادثہ تھا، لاشوں پر سیاست بانی پی ٹی آئی اور ان کی جماعت کا پرانا وطیرہ ہے۔