وی پی این استعمال کرتے ہیں؟ اب ایکس میں اس بارے میں دیگر صارفین کو بتایا جائے گا

جی ہاں واقعی ایکس کی جانب سے اب ظاہر کیا جائے گا کہ صارفین وی پی این استعمال کر رہے ہیں۔

ایکس کو پراڈکٹ ہیڈ Nikita Bier نے کچھ عرصے قبل اعلان کیا تھا کہ سوشل میڈیا پلیٹ فارم پر صارفین کے بارے میں زیادہ تفصیلات ڈسپلے کی جائیں گی، جیسے وہ کونسے ملک سے تعلق رکھتے ہیں یا وی پی این استعمال کرتے ہیں یا نہیں۔

اس کا مقصد جعلی اکاؤنٹس کے مسئلے پر قابو پانا ہے۔

اب وی پی این کے صارفین کی ایکس پروفائل میں دیگر افراد خبردار کیا جائے گا کہ یہ اکاؤنٹ جس ملک یا خطے سے تعلق بتا رہا ہے، وہ ممکنہ طور پر درست نہیں۔

ایکس میں اس فیچر کو متعارف کرانے کا سلسلہ 21 نومبر کو شروع ہوا۔

اب یہ عالمی سطح پر مکمل طور پر متعارف کرا دیا گیا ہے۔

Nikita Bier کے مطابق صارفین ایک پرائیویسی آپشن کو استعمال کرسکتے ہیں جس میں صرف آپ کے خطے کو ڈسپلے کیا جائے گا۔

مگر یہ سہولت ان ممالک کے اکاؤنٹس کو دستیاب ہوگی جہاں اس سوشل پلیٹ فارم کا استعمال ممکن نہیں یا اپنی رائے دینے پر سزاؤں کا سامنا ہوسکتا ہے۔

ابھی اس حوالے سے کافی کچھ معلوم نہیں جیسے یہ واضح نہیں کہ ایکس کی جانب سے کونسا ڈیٹا استعمال کرکے صارف کی لوکیشن کا تعین کیا جاتا ہے یا وی پی این یا پراکسی کنکشن کی نشاندہی کس طرح کی جاتی ہے۔

اس فیچر کے تحت آپ کی پروفائل پر اس وقت وارننگ دکھائی جائے گی جب سوشل میڈیا پلیٹ فارم کو معلوم ہوگا کہ آپ پراکسی یا وی پی این سروس سے منسلک ہیں۔

اس طرح کی سروس کے استعمال سے ملک یا خطے کا نام تبدیل ہو جاتا ہے۔

Nikita Bier کا دعویٰ ہے کہ اس طرح کی تفصیلات لگ بھگ 99.99 فیصد تک درست ہوتی ہیں۔

البتہ یہ واضح رہے کہ ایکس کی جانب سے صارفین کو وی پی این کے استعمال سے روکا نہیں جا رہا۔