وادی نیلم میں ٹور گائیڈ سیاحوں کو چھوڑ کر فرار، فیملیز مشکلات کا شکار

سیاحوں کے مطابق وہ دو کوسٹروں پر فیملیز کے ہمراہ لاہور سے وادی نیلم پہنچے تھے، تاہم ٹور گائیڈ اچانک انہیں چھوڑ کر فرار ہوگیا۔ متاثرہ سیاحوں نے الزام عائد کیا ہے کہ گائیڈ گیسٹ ہاؤسز کا کرایہ اور ان کے شناختی کارڈز بھی اپنے ساتھ لے گیا۔

ڈپٹی کمشنر نیلم کا کہنا ہے کہ صورتحال سے نمٹنے اور سیاحوں کی مدد کے لیے ضلعی انتظامیہ کی ٹیم روانہ کر دی گئی ہے۔ انہوں نے بتایا کہ ٹور گائیڈ کی تلاش کے لیے پولیس کو بھی احکامات جاری کر دیے گئے ہیں۔

انتظامیہ کے مطابق متاثرہ سیاحوں کو ہر ممکن سہولت فراہم کی جا رہی ہے تاکہ انہیں محفوظ طریقے سے واپس لایا جا سکے۔