سری لنکن خاتون نے شوہر کو بھی سعودیہ بلایا 17 سال سے مسجد الحرام میں خدمت کرنے والا سری لنکن جوڑا، ہر روز لاکھوں دعائیں سمیٹنے لگا

یہ شوہر اور بیوی کا جوڑا مسجد الحرام کے تقریباً 12 ہزار خدام میں شامل ہے جو زائرین اور معتمرین کی خدمت پر مامور ہیں۔
اس کہانی کا آغاز 17 سال قبل اس وقت ہوا جب سری لنکن مسلم خاتون فاطمہ کو حرم مکی میں حجاج و معتمرین کی خدمت کے لیے سعودی عرب آنے کا موقع ملا۔ کچھ عرصے بعد فاطمہ نے درخواست دی کہ تنہائی کے باعث اس کے شوہر اشرف کو بھی سعودی عرب بلایا جائے۔
فاطمہ کے مطابق وہ مسجد الحرام میں قالینوں اور جائے نمازوں کے شعبے میں خدمات انجام دیتی تھیں۔ بعد ازاں چار سال کی کوششوں کے بعد انتظامیہ نے ان کی درخواست منظور کرتے ہوئے ان کے شوہر کو بھی حرم مکی میں خدمت کے لیے بلا لیا۔
اشرف کے مطابق وہ سری لنکا میں تنہائی محسوس کرتے تھے اور ذہنی سکون نہیں ملتا تھا۔ انہوں نے بتایا کہ اب وہ اور ان کی اہلیہ فاطمہ ساتھ ساتھ حرم شریف میں کام کرتے ہیں۔
جوڑے کے مطابق وہ ہر ہفتے عمرہ ادا کرتے ہیں اور سعودی عرب آ کر ان کی زندگی مکمل طور پر بدل گئی ہے جو اب پہلے سے کہیں زیادہ پُرسکون اور بابرکت ہو چکی ہے۔