سندھ ہائیکورٹ کا نجی اسکولوں کو جون جولائی کی فیس ایک ساتھ وصول نہ کرنے کا حکم

جون، جولائی کی فیس،کتابیں اور یونیفارم کی خریداری کے خلاف درخواست پر سماعت سندھ ہائیکورٹ میں ہوئی، جس دوران سرکاری وکیل اور نجی اسکول کے ڈائریکٹوریٹ کا نمائندہ عدالت میں پیش ہوا۔

درخواست گزار کے وکیل نے کہا کہ فیس وصولی کے لیے ایک ساتھ 2،2 واؤچر تھما دیئے جاتے ہیں، چھٹیوں میں اسکول کی طرف کوئی سرگرمی نہیں ہوتی، اس لیے فیس وصول نہیں کی جاسکتی۔

عدالت نے اسکول انتظامیہ کو ایک ساتھ فیس وصول کرنے سے روکتے ہوئے ہدایت کی کہ چھٹیوں کی فیس وصولی کا نوٹس مئی میں دیا جائے، جون جولائی کی چھٹیوں کی فیس کے لیے 30 جون اور 30 جولائی تک کا وقت دیا جائے۔

سندھ ہائیکورٹ نے کہا کہ یونیفارم اور کتابوں کا معاملہ اسکول ڈائریکٹوریٹ اور فریقین بیٹھ کر معاملہ حل کریں، آئندہ 2 ہفتوں میں فریقین کتابوں اور یونیفارم کے معاملے پر میٹنگ کریں۔

عدالت نے نجی اسکول ڈائریکٹوریٹ اور دیگر کو ہدایت دیتے ہوئے درخواست نمٹا دی۔