غزہ میں جنگ بندی کے آغاز کے بعد امدادی سامان کے ٹرک مصر سے غزہ میں داخل ہونا شروع ہوگئے۔
غیر ملکی خبررساں ایجنسی کی جانب سے فراہم کردہ ویڈیو میں امدادی سامان سے لدے ٹرکوں کو غزہ میں داخل ہوتے ہوئے دیکھا جاسکتا ہے۔
جنگ بندی کے آغاز کے بعدآج تقریباً 200 امدادی ٹرک خوراک، ایندھن اور دیگر مدادی سامان لے کر غزہ میں داخل ہونا شروع ہوئے۔
غزہ جنگ بندی معاہدے کے تحت روزانہ تقریباً 600 ٹرک امدادی سامان لے کر رفح کراسنگ کے ذریعے غزہ میں داخل ہوں گے۔
تاہم رفح کراسنگ کی مرمت کا کام مکمل ہونے تک امدادی ٹرک کرم ابو سالم سرحدی گزرگاہ کو استعمال کریں گے۔
خیال رہے کہ غزہ میں گزشتہ 15 ماہ سے جاری بد ترین اسرائیلی جارحیت کے بعد آج سے جنگ بندی کا آغاز ہوگیا ہے۔
جنگ بندی کے پہلے روز حماس کی جانب سے 3 اسرائیلی خواتین قیدیوں کو رہا کیا گیا ہے جبکہ اسرائیل کی جانب سے آج 90 فلسطینی قیدیوں کو رہا کیا جائے گا۔
اسرائیلی جیل میں اس وقت ریڈ کراس کی ٹیم رہا ہونے والے فلسطینی قیدیوں کی تصدیق کررہی ہے۔
