*نادرا کا آن لائن شناختی کارڈ کے لیے اہم نیا فیچر متعارف*
نیشنل ڈیٹا بیس اینڈ رجسٹریشن اتھارٹی (نادرا) نے آن لائن شناختی کارڈ کے لیے درخواست دینے والے شہریوں کے لیے ایک نیا فیچر متعارف کرایا ہے۔ اس اپ ڈیٹ کی بدولت درخواست دہندگان درخواست مکمل کرنے سے پہلے ہی اپنے متوقع شناختی کارڈ کا نمونہ دیکھ سکتے ہیں۔
نادرا نے ‘پاک آئی ڈی’ (Pak ID) موبائل ایپ کا ورژن 5.6.6 جاری کیا ہے جس میں "ویو کارڈ” (View Card) کا نیا آپشن شامل ہے۔ اس فیچر کے ذریعے صارفین اپنی حتمی درخواست جمع کرانے سے قبل ان تفصیلات کا جائزہ لے سکتے ہیں جو ان کے شناختی کارڈ پر درج ہوں گی۔
ادارے کا کہنا ہے کہ شہری درخواست مکمل کرنے سے پہلے اپنی درج کردہ معلومات کا جائزہ لے سکتے ہیں اور کسی بھی غلطی کی اصلاح کر سکتے ہیں۔ معلومات کی درستگی کو یقینی بنانے کے لیے وہ ایپ کے ذریعے براہِ راست متعلقہ تفصیلات کو اپ ڈیٹ بھی کر سکتے ہیں۔
دریں اثنا، نادرا نے کہا ہے کہ یہ نیا فیچر آن لائن شناختی کارڈ کے عمل کو آسان بنائے گا اور ذاتی معلومات میں غلطیوں کو کم کرنے میں مددگار ثابت ہوگا۔
اس کے علاوہ، نادرا نے خیبر پختونخوا میں ڈیجیٹل رجسٹریشن کی خدمات کا دائرہ کار بھی وسیع کر دیا ہے۔ اب شہری ‘پاک آئی ڈی’ پلیٹ فارم کے ذریعے پیدائش، وفات، شادی اور طلاق کی رجسٹریشن کروا سکتے ہیں۔ See less
