انسداد منشیات فورس (اے این ایف) نے تعلیمی اداروں سمیت مختلف شہروں میں منشیات اسمگلنگ کے خلاف بھرپور کریک ڈاؤن کیا۔
تفصیلات کے مطابق اے این ایف نے تعلیمی اداروں کے اطراف اور ملک کے مختلف شہروں میں منشیات اسمگلنگ کے خلاف کریک ڈاؤن کرتے ہوئے 6 کاروائیوں کے دوران 6 ملزمان کو گرفتار کرکے 1 کروڑ 92 لاکھ روپے سے زائد مالیت کی 40.322 کلو گرام منشیات قبضے میں لے لی۔
تعلیمی اداروں میں کاروائیوں کے دوران گرفتار ملزم نے تعلیمی اداروں کے طلباء کو منشیات فروخت کرنے کا اعتراف کرلیا، رنگ روڈ پشاور میں یونیورسٹی کے قریب ملزم کے قبضے سے 2 کلو چرس برآمد ہوگئی۔
دیگر کاروائیوں میں چکلالہ گیریژن راولپنڈی میں کوریئر آفس میں میرپور بھیجے جانے والے پارسل سے 18 گرام ویڈ برآمد ہوا، چکلالہ گیریژن راولپنڈی میں ایک اور کارروائی کے دوران برطانیہ سے گجرات بھیجے جانے والے پارسل سے 104 گرام ویڈ برآمد کرلی گئی۔
صدر بائی پاس روڈ فیصل آباد کے قریب ٹرک سے 7 کلو ہیروئن برآمد کرکے 3 ملزمان کو گرفتار کر لیا گیا، شاہ فیصل روڈ کراچی پر موٹرسائیکل سوار 2 ملزمان سے 1200 گرام ویڈ اور کچلاک بائی پاس کوئٹہ کے قریب اسمگلنگ کے لئے چھپائی گئی 30 کلو آئس برآمد کرلی گئی۔
انسداد منشیات فورس (اے این ایف) ترجمان کا کہنا ہے کہ گرفتار ملزمان کے خلاف انسداد منشیات ایکٹ کے تحت مقدمات درج کر کے تحقیقات کا آغاز کر دیا گیا ہے۔
