کراچی: قائم مقام چیف جسٹس سندھ ہائی کورٹ نے ضلع مٹیاری میں عدالتی عمارتوں کی ناقص تعمیرات کی انکوائری کا حکم دے دیا۔
قائم مقام چیف جسٹس سندھ ہائی کورٹ نے معاملے کی انکوائری کا حکم دیتے ہوئے7 روز میں رپورٹ طلب کی ہے۔
اس حوالے سے پروجیکٹ ڈائریکٹر ایکسز ٹو جسٹس سہیل احمد مشوری کی جانب سے چیئرمین وزیراعلیٰ انسپیکشن ٹیم کو خط لکھا گیا ہے جس میں کہا گیا کہ ضلع مٹیاری میں حالیہ تعمیر ہونے والی 8 کورٹس اور دو بنگلوں کی تعمیرات ناقص ہیں۔
خط میں کہا گیا کہ عمارتوں کی تعمیرات مکمل ہونے کے فوری بعد عمارتوں کو شدید نقصان پہنچا ہے، وزیر اعلیٰ انسپیکشن ٹیم کی انکوائری میں تعمیراتی نقائص،فنڈز کے ضیائع کا تعین اور ناقص تعمیرات کے ذمہ داروں کا بھی تعین کیا جائے 7 روز میں انکوائری مکمل کرکے تفصیلی رپورٹ جمع کروائی جائے۔
