سانحہ زیارت میں شہید ہونے والے 17 پولیس اہلکاروں کے لواحقین نے میتوں کے ہمراہ کوئلہ پھاٹک کے مقام پر دوسرا احتجاجی دھرنا شروع کر دیا ہے، جس کے باعث سمنگلی روڈ سے شہر کی جانب آنے والی ٹریفک بھی مکمل طور پر معطل ہوگئی۔ دھرنے کے باعث شہریوں کو شدید مشکلات کا سامنا ہے جبکہ ٹریفک کا دباؤ متبادل شاہراہوں پر منتقل ہو گیا ہے۔
دوسری جانب سانحہ ہنہ اوڑک کے شہداء کے لواحقین ایئرپورٹ روڈ پر آج پانچویں روز بھی سراپا احتجاج ہیں۔ مسلسل دھرنے کے باعث شہداء کی تدفین تاحال نہیں ہو سکی، جبکہ لواحقین اپنے مطالبات کی منظوری تک احتجاج جاری رکھنے پر قائم ہیں۔
شہر میں جاری دونوں دھرنوں کے باعث معمولات زندگی متاثر ہونے لگے ہیں، جبکہ شہریوں اور مسافروں نے متعلقہ حکام سے صورتحال کے جلد حل کے لیے مؤثر اقدامات کا مطالبہ کیا ہے۔
