اسلام آباد: وزیر اعظم شہباز شریف نے کہا ہے کہ گولان کی پہاڑیوں کے معاملے پر پاکستان شام کے مؤقف کی بھرپور حمایت جاری رکھے گا۔
وزیر اعظم شہباز شریف سے شامی وزیر خارجہ اسعد حسن الشیبانی نے ملاقات کی، جس میں دونوں ممالک کے باہمی تعلقات اور علاقائی و عالمی امور پر تبادلہ خیال کیا گیا۔
وزیر اعظم نے شامی وزیر خارجہ کا خیرمقدم کرتے ہوئے صدر احمد الشرع کے لیے نیک خواہشات کا اظہار کیا اور شام کی خودمختاری، اتحاد اور علاقائی سالمیت کے لیے پاکستان کی غیرمتزلزل حمایت کا اعادہ کیا۔
شہباز شریف نے کہا کہ پاکستان اور شام کے تاریخی اور برادرانہ تعلقات کو عملی تعاون میں تبدیل کرنے کی ضرورت ہے۔ انہوں نے دونوں ممالک کے درمیان سیاسی، دفاعی، تجارتی، سرمایہ کاری اور تعلیمی شعبوں میں تعاون مزید بڑھانے پر زور دیا۔
وزیر اعظم نے کہا کہ پاکستان اور شام کے درمیان براہ راست پروازوں کی بحالی سے عوامی روابط میں اضافہ ہو گا۔ اور شام آنے والے پاکستانی زائرین کو بھی سہولت ملے گی۔ گولان کی پہاڑیوں کے معاملے پر پاکستان شام کے مؤقف کی بھرپور حمایت جاری رکھے گا۔
شامی وزیر خارجہ نے صدر احمد الشرع کی جانب سے وزیراعظم شہباز شریف کے لیے نیک خواہشات کا پیغام پہنچایا اور انہیں شام کی سیاسی صورتحال اور تعمیر نو کی کوششوں سے آگاہ کیا۔
اسعد حسن الشیبانی نے شام کے لیے پاکستان کی مسلسل حمایت پر شکریہ ادا کرتے ہوئے کہا کہ شامی حکومت پاکستان کے ساتھ تعلقات مزید مضبوط بنانے کی خواہاں ہے۔
