خیبر پختونخوا اسمبلی نے گوجری زبان کو پارلیمانی زبان قرار دینے کی منظوری دیدی

خیبر پختونخوا اسمبلی نے گوجری زبان کو پارلیمانی زبان قرار دینے کی منظوری دے دی۔

خیبر پختونخوا اسمبلی کے رولز 2025 میں ترمیم کرتے ہوئے گوجری زبان کو بھی فہرست میں شامل کرلیا گیا۔

حکومتی رکن آفتاب عالم نے ترمیم منظوری کے لیے ایوان میں پیش کی،جسے متفقہ طور پر منظور کرلیا گیا۔

اسپیکر بابر سلیم سواتی نے کہا کہ کے پی اسمبلی میں گوجری بولنے والوں کی بڑی تعداد موجود ہے۔ ان کا کہنا تھا کہ جب اسمبلی رولز 2025 بنائے گئے تو اُس وقت گوجری زبان کو شامل کرنا بھول گئے تھے۔

اسپیکر کے مطابق آج گوجری زبان کے اضافے کے بعد اسمبلی میں بات کرنے کے لیے زبانوں کی تعداد 6 ہوگئی ہے۔

اب اراکین صوبائی اسمبلی اردو، انگریزی، پشتو، سرائیکی، ہندکو کے ساتھ ساتھ گوجری زبان میں بھی اظہار خیال کرسکیں گے۔