اسلام آباد : جنوبی کوریا میں ملازمت کے خواہش مند پاکستانی کارکنوں کے لیے ایمپلائمنٹ پرمٹ سسٹم (ای پی ایس) قانونی روزگار کا ایک سرکاری ذریعہ ہے، جس کے تحت منتخب پاکستانی شہری مختلف شعبوں میں ملازمت کے لیے جنوبی کوریا جاسکتے ہیں۔
پاکستان میں ای پی ایس پروگرام اوورسیز ایمپلائمنٹ کارپوریشن (او ای سی) اور جنوبی کوریا کی ہیومن ریسورسز ڈیولپمنٹ سروس آف کوریا کے باہمی تعاون سے حکومتوں کے درمیان طے شدہ طریقہ کار کے تحت چلایا جاتا ہے۔
بیورو آف امیگریشن اینڈ اوورسیز ایمپلائمنٹ کے مطابق اس پروگرام کے ذریعے منتخب امیدواروں کو عموماً مینوفیکچرنگ، تعمیرات، زراعت اور بعض خدمات کے شعبوں میں ای نائن ورک ویزا پر ملازمت کا موقع مل سکتا ہے۔
ای پی ایس کے تحت بھرتی کا مقصد امیدواروں کے لیے واضح اور باقاعدہ انتخابی طریقہ کار، تحریری ملازمت کا معاہدہ اور جنوبی کوریا میں نافذ اجرت، لیبر رائٹس اور کام کی جگہ پر حفاظتی اصولوں تک رسائی یقینی بنانا ہے۔
تاہم ہر بھرتی مرحلے میں دستیاب شعبوں، نشستوں، تاریخوں اور دیگر شرائط کے لیے امیدواروں کو او ای سی کے تازہ ترین سرکاری اعلان کا لازماً جائزہ لینا چاہیے۔
درخواست گزار کی اہلیت
عمومی طور پر ای پی ایس کے لیے امیدوار کی عمر 18 سے 39 سال کے درمیان ہونا ضروری ہوتی ہے، تاہم عمر کی مخصوص تاریخیں اور دیگر شرائط ہر رجسٹریشن اعلان میں الگ سے درج کی جاتی ہیں۔
امیدوار کے پاس درست پاسپورٹ ہونا چاہیے اور اسے صحت سے متعلق مقررہ ملازمت کے تقاضے پورے کرنا ہوتے ہیں۔ اس کے علاوہ مجرمانہ ریکارڈ، جنوبی کوریا میں غیر قانونی قیام یا سابقہ ملک بدری، جبکہ پاکستان سے بیرونِ ملک سفر پر کسی قانونی پابندی کی موجودگی بھی امیدوار کی اہلیت پر اثر انداز ہوسکتی ہے۔
درخواست دینے سے پہلے قومی شناختی کارڈ، پاسپورٹ اور تعلیمی یا دیگر متعلقہ دستاویزات میں درج نام، تاریخ پیدائش اور دیگر کوائف کا آپس میں موازنہ کرلینا ضروری ہے تاکہ رجسٹریشن کے وقت کسی تضاد کی وجہ سے مسئلہ پیش نہ آئے۔
ای پی ایس ٹاپک امتحان کیسے ہوتا ہے؟
جنوبی کوریا میں ملازمت کے لیے انتخاب کے عمل میں کوریائی زبان اور متعلقہ کام کی مہارت بنیادی اہمیت رکھتی ہے۔ امیدواروں کو پہلے کمپیوٹر پر ای پی ایس ٹاپک امتحان دینا ہوتا ہے، جس میں کام اور روزمرہ زندگی سے متعلق کوریائی زبان پڑھنے اور سمجھنے کی صلاحیت جانچی جاتی ہے۔
مطلوبہ معیار پر پورا اترنے والے امیدوار اگلے مرحلے یعنی اسکلز اور قابلیت کے ٹیسٹ کے لیے اہل ہوسکتے ہیں۔
اس مرحلے میں متعلقہ شعبے کے عملی کام کی صلاحیت، جسمانی استعداد، ہاتھ اور آنکھ کی ہم آہنگی، رنگوں کی پہچان اور اعلان کے مطابق قابلِ تصدیق تجربے یا ہنر کے سرٹیفکیٹ کو بھی مدنظر رکھا جاسکتا ہے۔
امیدوار تیاری کے لیے سرکاری امتحانی پورٹل پر دستیاب نصابی کتابوں، مشقی مواد، اسکل ٹیسٹ سے متعلق معلومات اور رنگوں کی پہچان کے ابتدائی خود جائزے سے بھی فائدہ اٹھا سکتے ہیں۔
ای پی ایس کے خواہش مند امیدواروں کو کوریائی زبان میں فیکٹری، اوزار، حفاظتی ہدایات، سپروائزر کی گفتگو اور روزمرہ کام سے متعلق کوریائی الفاظ اور جملوں پر توجہ دینی چاہیے۔
امتحان میں کامیابی کے بعد؟
امتحان اور دیگر مقررہ مراحل میں کامیابی حاصل کرنے کے بعد امیدوار کا نام جاب سیکر رجسٹر میں شامل کیا جاسکتا ہے، اس کے بعد جنوبی کوریا کا آجر امیدوار کا انتخاب کرتا ہے اور ملازمت کا معاہدہ جاری کیا جاتا ہے۔ تاہم صرف امتحان پاس کرنا یا جاب سیکر رجسٹر میں نام شامل ہوجانا ملازمت کی ضمانت نہیں ہوتا۔
اس کے بعد میڈیکل، ویزا، روانگی سے قبل لازمی تربیت اور دیگر قانونی کارروائی سرکاری ہدایات کے مطابق مکمل کرنا ہوتی ہے۔
فراڈ سے کیسے بچیں؟
ای پی ایس کے ذریعے جنوبی کوریا جانے کے خواہش مند افراد کے لیے سب سے اہم بات یہ ہے کہ وہ صرف او ای سی کے سرکاری اعلانات اور مقررہ طریقہ کار پر اعتماد کریں۔
کسی نجی ایجنٹ یا فرد کی جانب سے ’پکی نوکری‘، ’بغیر امتحان انتخاب‘ یا ’فہرست میں نام ڈلوانے‘ کے دعوے پر رقم ادا نہ کریں۔ اور ادائیگیوں سے متعلق معلومات کی سرکاری ذرائع سے تصدیق کریں۔
او ای سی کا ای پی ایس لنک :
https://www.oec.gov.pk/eps
کوریائی زبان اور اسکل ٹیسٹ کا سرکاری پورٹل
https://epstopik.hrdkorea.or.kr/
